Секој град има своја историја, свое минато и неговото население се гордее со него. Тоа неразделно ги врзува луѓето да ја почитуваат и да им ја пренесуваат на помладите генерации.Зборуваме за градот на Охридското Езеро, за историјата на градот во која секој камен од старата калдрма и секоја школка од бистрото езеро претставува делче од пирамидата на историјата на нашиот град Струга. Тоа е градот на занаетчиите, градот на Просветителите Димитри и Константин Миладинови како вистински симболи и непресушен извор на словенската култура и писменост. Во текот на својата долга, богата и светла традиција, овој град доживува период на голем подем на развој на културата и стопанството, но честопати бил и мета на многубројните освојувачи.
Градот Струга се протега на крајниот југозапад на Република Македонија, кој живеејќи со векови добил своевидна физиономија во историско, архитектонска, ликовна и естетска смисла.
Струга, градот на двете бели води се наога на 689 м надморска височина. Сместена е во подножјето на планината Јабланица во Охридско–Струшката котлина, на северниот брег од Охридското Езеро, непосредно на местото каде што се излива реката Црн Дрим од Охридското езеро, односно од обете страни на реката. Иако опколена со високи планини Струга, односно Охридско-Струшката котлина е добро поврзана со соседните области и воедно добро пристапна.
Интернационалниот аеродром е на 7 километри од градот.
Струшката општина зафаќа површина од 50.703ха или 1/3 од вкупната копнена брегова линија на Езерото и е половина од вкупната копнена површина на котлината.

КЛИМА

Струга и нејзината околина има умерено континентална клима со примеси на медитеранска. Бројот на сончеви часови е околу 2 400, а водата во Охридското Езеро е најтопла во август кога во просек изнесува 23 Ц, во јули 22,5 Ц додека средната годишна температура на водата изнесува 12 Ц.
Во годината просечно има околу 80 летни денови каде температурата се движи над 25Ц. Средната годишна температура на воздухот изнесува 11,5 Ц а средната летна температура е 20.5 Ц.
Во зимската сезона средно месечните температури се над нулата,што дава можност за пријатен престој и во овој дел од годината. Просечните врнежи во околината изнесуваат приближно 759 мм годишно.
Честината на ветровите и мирните периоди се менуваат во текот на денот, посебно во летниот период.
Утрата се карактеризираат со доминација на северните ветрови и тишините. Состојбата целосно се менува попладне, кога ветровите од југ и југо-исток ја потиснуваат тишината.

ОХРИДСКО ЕЗЕРО

Охридското Езеро со својата старост помеѓу 4 и 10 милиони години, претставува најстаро езеро во Европа и воедно едно од најстарите во светот. По потекло е тектонско и е настанато во терциерниот период пред глацијацијата.
Во басенот на езерото има околу 50 милијарди м3 вода и бидејќи Езерото се вбројува во суптропските езера никогаш не замрзнува.
Бојата на водата покрај брегот е маслинесто зелена, а кон средината небесно сина. Водата е многу бистра, бидејќи потекнува од крашки извори. Поради тоа и проѕирноста е голема- до 21,5 м.
Температурата на водата на Езерото, неговата чистота и бистрина, температурата на воздухот, просторот во кој е лоцирано Езерото со својата природна атрактивност, богатиот рибен фонд како магнет ги привлекуваат туристите и го прават најпосетено Езеро во Републикава.
И зарем има нешто поубаво и повеличествено од истекот на реката Црн Дрим од Езерото? Овој природен феномен ја опседнува и облагородува душата со најубави чувства. Реката протекува полека низ градот, како да не сака да ги вознемири посетителите кои шетаат по нејзините кејови, фасцинирани од нејзините кристално чисти води. Навечер реката изгледа уште поубаво со светлината на светилките која се одбива од нејзините води. На патот кон Јадранското море Дрим формира две вештачки езера Глобочица и Шпиље кои се опкружени со прекрасни пејсажи.
Реката Црн Дрим со својата клисура и двете вештачки езера станува се поинтересно место за рекреација не само за спортските риболовци туку и за сите оние кои сакаат да уживаат во нејзината убавина.
Интересно е да се спомене дека токму старото име на градот Струга, Енхалон доаѓа од водите на реката Црн Дрим поточно од јагулата која живее во Охридското езеро но преку реката Црн Дрим патува се до Атланскиот океан за да се размножи .Тоа е познатиот Свадбен пат на јагулата кој започнува од реката Црн Дрим за преку реката Дрим кој се образува од Црн Дрим и Бел Дрим во Албанија да дојде до Јадранско море.И нејзиниот пат тука не застанува,туку преку Јонско море и Средоземно море преку Гибралтарскиот проток дојде до Саргасово море.Таму се наоѓа со својот партнер ,се размножува и се раѓаат многу мали јагули.Тука мајката јагула умира а после неколку година како некоја биолошка меморија која постои во нив младите јагули се враќаат по истиот пат што го поминала нивната мајка за да дојдат назат во Охридското езеро,а сето тоа трае со векови наназад.

СТАРИТЕ СТРУЖАНИ ЌЕ РЕЧАТ

"Кога ќе пукне туристичката сезона, Струга наеднаш се изменува, небаре низ чаршијата пројурил Св. Ѓорѓија на бел коњ и со копје им ја пуштил застојаната крв, и се се разживеало."
Токму тоа е она што ја чини душата на Струга и ја храни душата на секој турист. Туристите во Струга доаѓаат да ја скротат болката барајќи мелем, а мелемот можат да го најдат само во старите долапи на градските куќи и во вечната лековита вода на езерото.
Туристите доаѓаат и си заминуваат, и градот се менува, не е оној истиот. Само светлината која зрачи од градот е иста. Исти се и оние незаборавни залези во лето кои траат долго, многу долго и не Ви дозволуваат да го свртите погледот, Ве оставаат со часови да седате приковани за едно место, се додека не се стемни и првите ѕвезди не се појават на небото, а водата пред Вас се менува и ја добива онаа чудно сафирно-сина боја која Ве маѓепсува и Ви создава чувство на немоќ и меланхонија. Тоа чувство, тоа небо, таа вода секој кој го доживеал никогаш нема да ги заборави. И во најдалечните места на светот ќе ги понесе со себе, ќе ги чува и ќе се сеќава на нив и ќе посака на крајот кога “сонцето ќе зајдвит” да биде овде покрај оваа света вода на Дримот и Езерото.