Дигитални приказни

Од 19 до 21 Јуни во Струга се одржа работилница за дигитално пренесување на приказни во организација на Локалната агенција за развој - Струга и Метаморфозис - Скопје. На оваа работилница учество зедоа 15 млади луѓе. Темата на оваа работилница беше “Дружење во мултиетничка средина”, на која што учесниците подготвуваа свои дигитални приказни од кои секоја пренесуваше посебна порака.

Дигиталните приказни претставуваат форма на пренесување на лични искуства, знаења, ставови, случувања од разни области и на разни теми, при што нивната содржина се раскажува усно, а се визуелизира со помош на слики, видеа, ефекти и други додатоци. Работилниците за дигитални приказни овозможуваат интересен концепт на работа во групи, при што истовремено секој има можност да развива сопствени вештини и да ги искаже сопствените размислувања. Учесниците работеа во парови, како резултат на што произлегоа 5 различни приказни во времтраење од 2 до 5 минути. Идејата беше двајца учесници заеднички да работат на развој на една приказна, која може да биде прикажана од различна перспектива и прочитана со различен глас и на различен јазик. Во текот на 3 дена, учесниците имаа можност да научат да фотографираат, да бараат и да уредуваат фотографии, да снимаат и обработуваат аудио материјал, видео монтажа и објавување на готовите видеа на интернет.