Што е ЕВС и како функционира?

Европскиот Волонтерски Сервис (ЕВС) како дел од програмата „Млади во Акција“ (2007-2013) од Европската Унија, има за цел да ги поддржи младите луѓе и нивното учевство во различни видови непрофитни и волонтерски активности во странство. Европскиот Волонтерски Сервис (ЕВС) е одлична можност за вас да се здобиете со работно искуство во некоја од Европските држави, да запознаете нови пријатели, стекнете нови способности и придонесете за развој на локалните заедници. Да се биде волонтер во друга земја значи работење на интересен проект по ваш избор при што нема да примате плата, но ќе ви биде обезбеден месечен надомест кој ги покрива сите ваши трошоци за живеење. Трошоците за сместување, храна, интернационален и локален превоз поврзани со вашиот проект, здравствено осигурување и џепарлак се покриваат од страна на програмата „Младите во Акција“ од Европската Комисија. Исто така добивате и бесплатен јазичен курс кој ќе ви помогне да работите и живеете во државата која сте ја избрале како дестинација.

Траење на проектите:

• 2 до 12 месеци индивидуална ЕВС активност
• 2 седмици до 12 месеци групна ЕВС активност, групи од 2-30 волонтери
• 2 седмици до 2 месеци ЕВС активност за краток период наменета за млади луѓе кои се соочуваат со одредени пречки и тешкотии

Имате можност да работите на различни полиња: уметност и култура, спорт, социјална работа, здравствена заштита, животна средина, итн. Така што можете да одберете проект кој најблиску се совпаѓа со вашите интереси.

Кој може да учествува?

Програмата е наменета за СИТЕ млади луѓе од Европа на возраст од 18-30 години без разлика на нивната културна, социјална, образовна или економска позадина. ЕВС е искуство кое се случува еднаш во животот - волонтерот може да учествуваа само во една ЕВС активност. Сепак, исклучок може да се направи во случаи на волонтери со помали можности кои може да земат учество во повеќе од една ЕВС активност, под услов вкупното времетраење на периодите на волонтирање да не е подолго од 12 месеци.

Зошто да станете волонтер?

Поради многу причини! Прво, ова е можност да патувате во светот, да запознаете нова култура и да научите или совладате нов јазик. Исто така е добро за збогатување на вашето резиме (CV). ЕВС ви нуди вистинска можност да стекнете работно искуство во област која самите сте ја одбрале за вашиот проект (уметност и култура, спорт, социјална работа, здравствена заштита, животна средина, итн.), која може да ви обезбеди додадена вредност подоцна на пазарот на труд. Со ЕВС исто така можете да ја откриете вашата идна струка! Ова е уникатна можност за запознавање на нови и интернационални пријатели и да ја проширите вашата мрежа на социјални контакти за идни можности. Ќе имате можност да придонесете за развојот на вашата заедница, да бидете млад амбасадор на Македонија во другите земји и да им овозможите на другите луѓе да дознаат повеќе за вашата култура додека вие се запознавате со нивната. И секако, ЕВС ве тера да се развивате! Со живеење во друга земја, во нова средина која претставува предизвик, вие ги развивате вашите вештини за донесување одлуки, станувајќи независен и активен граѓанин.

Некои од типичните придобивки на младите со учевство во ЕВС:

• Зголемена самодоверба
• Чувство на независност и самоиницијатива
• Компетентност во странски јазици
• Комуникациски вештини
• Способност за управување со проекти
• Интеркултурено чувство и свесност
• Способност за тимска работа
• Воспоставување на мрежи и партнерства
• Зголемено работно искуство

Што треба да направам за да станам волонтер во странство?

Во врска со испраќање ЕВС волонтери, ЛАР Струга ги предложува следниве чекори за вклучување во ЕВС програмата за волонтери од Македонија кои сакаат да волонтираат во странство:

1. Контактирајте ја ЛАР Струга
Добредојдени сте да не контактирате на contact@ldastruga.org ако размислувате за можноста да бидете волонтер во странство. Со задоволство ќе ви помогнеме при наоѓање на проект, објаснување како функционира ЕВС програмата, да ви одговориме на сите ваши прашања и преземање на одговорноста да бидеме вашата организација -испраќач.
2. Наоѓање на организација – домаќин
Можете да пристапите во базата и да барате проект кој ќе одговара на вашите интереси:ec.europa.eu
или пребарување на слободни ЕВС позиции преку фан страната на Фејсбук: www.facebook.com

Ако не можете да најдете проект сами, можеме да почнеме заеднички да работиме на пронаоѓање на партнер организација. Запомнете дека средувањето на сите формалности може да потрае и неколку месеци, така што ако сакате да бидете ЕВС волонтер контактирајте нѐ однапред.

3. Пополнување на апликација
Кога сите три партнери (вие, ЛАР Струга и организацијата - домаќин) сте се согласиле околу позицијата и се разјаснети сите детали, ЛАР Струга и организацијата - домаќин ќе ја достават вашата апликација до Европска Комисија или соодветната Национална Агенција. Доколку вашата апликација е прифатена, ќе ви биде одобрен грант кој ќе ги покрие сите ваши трошоци како што се: за патување, здравствено осигурување, храна и сместување, обука и џепарлак. Исто така добро е да знаете дека кога аплицирате за ЕВС ништо не се плаќа! Нема да примате плата, но ќе примате парични средства со кои ќе бидат покриени вашите основни потреби пр.125еу/месец за Франција.
4. Учество на обуки
Учеството на обука за ЕВС волонтери пред заминување во ЛАР Струга е задолжително.

ЕВС не е...

• Повремено и неорганизирано волонтирање на скратено време
• Стажирање во компанија
• Платена работа и не смее да е замена за платени работни места
• Рекреација или туризам
• Јазичен курс
• Експлоатација на евтина работна рака
• Период на студии или стручна обука во странство

ЕВС не е финансиски, туку квалитетен модел за транснационален волонтерски сервис.

За сите подетални информации околу процесот за аплицирање или станување дел од активностите во рамките на програмата „Млади во акција“, контактирајте на контакт информациите од ЛАР.